ᑲᑎᒪᔨᖏᑦ

ᑕᓪᓕᒪᐅᕗᑦ (5) ᑲᑎᒪᔩᑦ, ᐊᑕᐅᓯᕐᒥᒃ (1) ᑐᑭᒧᐊᑦᑎᓯᔨᖃᕐᓱᑎᒃ. ᑲᑎᒪᔩᑦ ᐃᒣᓕᖓᔪᒥᒃ ᑎᒃᑯᐊᑕᐅᓯᒪᓂᖃᓲᑦ:

ᐊ) ᒪᕐᕉᒃ (2) ᑲᑎᒪᔩᒃ ᑎᒃᑯᐊᑕᐅᓯᒪᔫᒃ ᑲᕙᒪᑐᖃᒃᑯᑦ ᑐᕐᖃᑕᕐᕕᖓᓄᑦ ᑕᖅᕋᒥ ᐃᓄᓕᕆᓂᕐᒧᑦ, ᒪᑭᕝᕕᒧᑦ ᑎᒃᑯᐊᑕᐅᔪᑦᓴᓕᐊᕆᔭᐅᑦᓱᑎᒃ;

ᐸ) ᐊᑕᐅᓯᖅ (1) ᑲᑎᒪᔨ ᑎᒃᑯᐊᑕᐅᒐᔭᕐᑎᓗᒍ ᑐᕐᖃᑕᕐᕕᖓᓄᑦ ᑲᓇᑕᐅᑉ ᑲᕙᒪᖓᑕ;

ᑕ) ᐊᑕᐅᓯᖅ (1) ᑲᑎᒪᔨ ᑎᒃᑯᐊᑕᐅᒐᔭᕐᑎᓗᒍ ᑐᕐᖃᑕᕐᕕᖓᓄᑦ ᑲᓇᑕᐅᑉ ᑲᕙᒪᖓᓄᑦ ᐊᐅᓚᑕᐅᔪᓄᑦ ᓄᓇᖃᕐᕕᐅᔪᓄᑦ ᑲᒪᒋᔭᑦᓴᓕᓐᓄᑦ ᐱᑦᓴᖑᕐᑐᓴᓕᕆᓂᕐᒥᒃ;

ᑲ) ᑎᒃᑯᐊᑕᐅᓯᒪᔪᓂᒃ ᐊᖏᕈᑕᐅᑦᓱᑎᒃ ᑲᑎᒪᔨᖕᖑᖃᑕᐅᑎᑕᐅᔪᓄᓪᓗ ᑎᒃᑯᐊᑕᐅᓯᒪᔪᓄᑦ (ᐊ) -ᒥᑦ (ᐸ)-ᒥᓪᓗ, ᑐᑭᒧᐊᑦᑎᓯᔨ ᑎᒃᑯᐊᑕᐅᓯᒪᒐᔭᕐᑐᖅ ᑲᕙᒪᑐᖃᒃᑯᑦ ᑐᕐᖃᑕᕐᕕᖓᓄᑦ ᑲᒪᒋᔭᑦᓴᓕᒻᒧᑦ ᑕᖅᕋᒥ ᐃᓄᓕᕆᓂᕐᒥᒃ ᖃᐅᔨᒋᐊᕐᕕᖃᕐᓯᒪᓗᓂ ᑲᓇᑕᐅᑉ ᑲᕙᒪᖓᓄᑦ ᐊᐅᓚᑕᐅᔪᒦᑦᑐᑦ ᓄᓇᖃᕐᕕᐅᔪᑦ ᑲᕙᒪᖓᓂᒃ.

ᑎᒃᑯᐊᑕᐅᒋᐊᖃᓯᑉᐸᑦ ᑐᑭᒧᐊᑦᑎᓯᔨᑦᓴᖅ, ᓄᓇᕕᒻᒥᐅᒥᒃ ᓯᕗᓪᓕᐅᔭᐅᔪᖃᕋᔭᕐᑐᖅ ᑎᒃᑯᐊᑕᐅᔪᑦᓭᑦ ᐊᑦᔨᒌᒥᒃ ᐱᒍᓐᓇᓂᖃᑦᓯᐊᕈᓇᐅᑎᓪᓗᒋᑦ.

ᐊᑐᓂ ᑲᑎᒪᔩᑦ ᐊᕐᕌᒍᓂ ᐱᖓᓱᓂ ᐃᓕᒪᒋᐊᖃᕋᔭᕐᑐᑦ ᑲᑎᒪᔨᐅᖃᑕᐅᔪᕐᓗ ᑎᒃᑯᐊᑕᐅᒋᐊᓪᓚᕈᓐᓇᒥᑦᓱᓂ.

ᑐᑭᑖᕈᑕᐅᔪᓕᒫᑦ ᑲᑎᒪᔨᓄᑦ NMRIRB ᑐᑭᑖᕈᑕᐅᓲᑦ ᐊᒥᓲᓂᕐᓭᑦ ᓂᕈᐊᑐᐊᕐᒪᑕ ᑐᑭᑖᕈᓐᓇᑐᐃᓪᓗ ᐅᓄᕐᓂᕆᒋᐊᓕᖏᑦ ᓈᒻᒪᑐᐊᕐᒪᑕ (ᐱᖓᓲᒋᐊᖃᓲᑦ (3)). ᑲᑎᒪᔩᑦ ᐊᑐᓂ ᑐᑭᒧᐊᑦᑎᓯᔨ ᓚᔭᐅᖕᖏᑐᖅ ᐊᑕᐅᓯᐊᕐᓗᑎᒃ (1) ᓂᕈᐊᕈᓐᓇᑐᑦ ᑐᑭᑖᕆᐊᖃᓕᑐᐊᕐᒪᑕ ᓄᓇᕕᐅᑉ ᑕᕆᐅᖓ ᓱᕐᕋᑕᐅᓕᕐᒪᖔᑦ ᕿᒥᕐᕈᔩᑦ ᑲᑎᒪᔨᖏᑦ. ᐊᑦᔨᒌᒥᒃ ᓂᕈᐊᕐᑕᐅᔪᖃᑐᐊᕐᒪᑦ, ᑐᑭᒧᐊᑦᑎᓯᔨ ᓂᕈᐊᓕᕋᔭᕐᑐᖅ.

- ᑐᑭᒧᐊᑦᑎᓯᔨ



ᑎᓕᔨᔨᒋᓯᒪᔭᖏᑦ:

ᐱᑕ ᒣ - ᑐᑭᒧᐊᑦᑎᓯᔨᐅᑉ ᑐᖓᓕᖓ

ᑎᓕᔭᐅᓯᒪᓂᖓᑕ ᐃᓱᓕᕕᑦᓴᖓ: ᓯᑦᑎᒻᐸ 19, 2024
ᓄᓇᓕᖓ: ᑰᑦᔪᐊᖅ, ᑯᐯᒃ
ᑎᓕᔨᔨᒋᓯᒪᔭᖏᑦ: CIRNAC ᐅᓐᓂᑐᑎᒋᓯᒪᔭᖓᓂᐅᒃ ᒪᑭᕝᕕᑯᑦ

ᐱᑕ ᐃᓅᓕᕐᓯᒪᔪᖅ ᓄᕕᒻᐸ 12, 1958-ᒥ ᑰᑦᔪᐊᑐᖃᕐᒥ (ᑰᑦᔪᐊᒥ). ᐱᕈᕐᓴᑕᐅᓯᒪᑦᓱᓂ ᑰᑦᔪᐊᑉ ᓴᓂᐊᓂ ᑲᖏᕐᓱᐊᓗᑦᔪᐊᓗ ᓴᓂᐊᓂ. ᐱᑕ ᑎᒃᑯᐊᑕᐅᓯᒪᔪᖅ ᒪᑭᕝᕕᒧᑦ ᑲᑎᒪᔨᐅᖃᑕᐅᓂᐊᓕᕐᑎᓗᒍ ᓄᓇᕕᐅᑉ ᑕᕆᐅᖓ ᓱᕐᕋᑕᐅᓕᕐᒪᖔᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᑎᓯᒻᐸ 2009-ᒍᑎᓪᓗᒍ ᓱᓕᓗ ᑲᑎᒪᔨᐅᕕᒋᑦᓱᒍ. ᐱᓇᓱᐊᕐᓯᒪᔪᖅ ᓄᓇᕕᒻᒥ ᖃᐅᔨᓴᕐᕕᒥ (ᒪᑭᕝᕕᒥ) 1983-ᒥᓂᑦ ᓱᓕᓗ ᑌᑲᓂ ᐱᓇᓱᐊᕐᓱᓂ ᐊᑦᔨᒌᖕᖏᑐᓂᒃ ᐆᒪᔪᓕᕆᓂᕐᓅᓕᖓᔪᓂᒃ ᐃᓚᖃᕐᒥᑎᓪᓗᒋᑦ ᐱᓇᓱᐊᕐᑕᖏᑦ ᖃᐅᔨᓴᕐᓂᒥᒃ ᐅᔭᕋᕐᓂᐊᕕᐅᒍᒪᒐᔭᕐᑐᓂᒃ. ᐅᐱᖕᖔᑯᑦ (ᐊᐅᔭᒃᑯᑦ) ᓇᒻᒥᓂᕐᒥᓂᒃ ᐊᐅᓚᑦᓯᓲᖅ ᓵᒪᓐᓂᐊᕕᒻᒥᒃ ᑲᖏᕐᓱᐊᓗᑦᔪᐊᒦᑦᑐᒥᒃ. Pyramid Mountain Camp. ᓱᖃᑦᓯᖑᐊᕈᑎᖃᓲᖅ ᐆᒪᔪᕕᓂᕐᓂᒃ ᑎᒥᖕᖑᐊᓕᐅᕐᓂᒥᒃ, ᒪᙯᓐᓂᒥᒃ ᐃᕐᖃᑕᕆᐊᕐᖃᑦᑕᓂᕐᒥᓗ ᓵᒪᓂᒃ.

ᑲᑎᑎᑕᐅᓯᒪᖃᑎᓕᒃ ᐊᕐᓇᒥᓂᒃ ᑳᑐᕆᓐ ᐹᕐᖂᒥᒃ ᕿᑐᕐᖓᖃᕐᓱᑎᒃ ᐱᖓᓱᓂᒃ.

ᓃᓪ ᑯᔦᒃ - ᑲᑎᒪᔨ

ᑎᓕᔭᐅᓯᒪᓂᖓᑕ ᐃᓱᓕᕕᑦᓴᖓ: ᐊᐅᒡᒍᓯ 23, 2022
ᓄᓇᓕᖓ: ᑰᑦᔪᐊᖅ, ᑯᐯᒃ
ᑎᓕᔨᔨᒋᓯᒪᔭᖏᑦ: CIRNAC

ᓃᓪ ᐅᑭᐅᕐᑕᑐᒥ ᐱᓇᓱᐊᖃᑦᑕᓯᒪᓕᕐᑐᖅ ᐊᕐᕌᒍᐃᑦ 50 ᐅᖓᑖᓅᕐᑐᓂ. ᑕᑉᐱᑯᓄᓂ ᐊᕐᕌᒍᓃᑦᑐᓂ, 40 ᐊᕐᕌᒍᐃ ᐅᖓᑖᓅᕐᑐᓂᒃ ᐱᓇᓱᐊᕐᓯᒪᓱᓂ ᐅᒥᐊᕐᕈᐊᓕᕆᓂᕐᒥᒃ ᐱᓇᓱᐊᕐᓯᒪᑦᓱᓂᓗ ᓄᓇᓕᓐᓂ ᐃᖃᓗᓕᕆᓂᕐᒥᒃ ᐅᒥᐊᕐᕈᐊᓕᕆᓂᕐᒥᓗ. ᐃᑲᔪᕐᓯᖃᑕᐅᓯᒪᑦᓱᓂᓗ ᓄᐃᑕᐅᕙᓪᓕᐊᓂᖓᓂᒃ ᑕᖅᕋᒥ ᑭᖑᕐᓚᓂᐊᕐᓂᐅᑉ ᑲᓇᑕᒥ ᓇᓗᓀᕐᓯᓯᒪᑦᓱᓂ ᐊᒥᓱᓂᒃ ᓄᑖᓂᒃ ᐃᑲᔪᕐᓯᒍᑎᑦᓴᓂᒃ ᐱᕙᓪᓕᐊᔭᐅᓂᕆᒋᐊᓕᖓᓄᑦ ᑲᔪᓯᑎᑕᐅᓂᕆᒋᐊᓕᖓᓄᓪᓗ ᖃᐅᔨᓴᕐᓃᑦ ᐱᒋᐊᕐᑎᑕᐅᓯᒪᓂᖏᑦᑕ ᑕᖅᕋᓕᒫᒥ. ᐱᓇᓱᐊᖃᑦᑕᐅᓯᒪᑦᓱᓂᓗ ᐱᕙᓪᓕᐅᔭᐅᓂᖓᓂᒃ ᑭᖑᕐᓚᓂᐊᕐᓂᐅᑉ ᑲᓇᑕᒥ ᑲᒪᒋᔭᖃᕐᓯᒪᑦᓱᓂᓗ ᓇᓗᓀᕐᓯᖃᑦᑕᓂᕐᒥᒃ ᐊᒥᓱᓂ ᓄᑖᓂᒃ ᐃᑲᔪᕐᑕᐅᒍᑎᑦᓴᓂᒃ.
ᐅᒥᐊᕐᕈᐊᓕᕆᓂᕐᒥᒃ ᐱᓇᓱᐊᖃᑦᑕᓯᒪᒻᒥᓱᓂ, ᓃᓪ ᐱᓇᓱᐊᓕᓂᓪᓚᕆᐅᒋᕗᖅ ᐱᓇᓱᒐᖃᕐᕕᒥᒃ ᐊᐅᓚᑦᓯᔨᐅᓂᕐᒥᒃ ᖃᐅᔨᒋᐊᕐᕕᖃᖃᑦᑕᓯᒪᑦᓱᓂᓗ ᐊᑦᔨᒌᖕᖏᑐᓂᒃ ᓯᓚᕐᔪᐊᓕᒫᒥ ᐱᓇᓱᐊᕐᑕᐅᔪᓂᒃ ᐊᑦᔨᒋᖕᖏᑐᓂᒃ ᐱᓇᓱᕝᕕᓂᒃ ᖃᐅᔨᒋᐊᕈᑦᔨᓱᓂ ᐱᒋᐊᕐᑕᐅᓯᒪᔪᓂᒃ Africa-ᒥ, Central America-ᒥᓪᓗ.

ᓃᓪ ᑰᑦᔪᐊᒥᐅᒍᕗᖅ ᑕᒐᑕᒐ ᑐᑭᒧᐊᑦᑎᓯᒋᐊᖃᕐᓂᒧᑦ ᐊᐅᓚᑦᓯᒋᐊᖃᕐᓂᒧᓪᓗ ᐃᒫᙰᓚᔨᐅᑦᓱᓂ ᐱᓇᓱᒐᖃᕐᕕᓂᒃ.

ᓘᑲᓯ ᐊᔭᒍᑌᓐᓇᖅ - ᑲᑎᒪᔨ

ᑎᓕᔭᐅᓯᒪᓂᖓᑕ ᐃᓱᓕᕕᑦᓴᖓ: ᒫᑦᓯ 4, 2022
ᓄᓇᓕᖓ: ᓴᓪᓗᐃᑦ, ᑯᐯᒃ
ᑎᓕᔨᔨᒋᓯᒪᔭᖏᑦ: ᓄᓇᕘᕐᒥᐅᑦ ᑲᕙᒪᖓ

ᓘᑲᓯ ᐃᓅᓕᕐᓯᒪᔪᖅ ᓯᕿᓂᖓᓂ ᕿᑭᕐᑌᑦ. ᓘᑲᓯ ᐊᓪᓚᕕᒻᒥ ᑲᒪᔨᐅᓯᒪᓕᕐᑐᖅ ᓴᓂᑭᓗᐊᕐᒥ ᒪᙯᑦᑏᑦ ᒥᑭᒋᐊᕐᓂᐊᑏᓪᓗ ᐃᑲᔪᕐᓯᔭᐅᕕᖓᓂ 1978-ᒥᓂᑦ. ᓄᓇᕕᐅᑉ ᑕᕆᐅᖓ ᓱᕐᕋᑕᐅᓕᕐᒪᖔᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᑎᒃᑯᐊᑕᐅᖃᕐᓯᒪᔪᖅ 2009-ᒥ ᓂᕈᐊᕋᑦᓴᖑᕐᑎᑕᐅᓯᒪᑦᓱᓂᓗ ᓄᓇᕘᕐᒥᐅᑦ ᑲᕙᒪᖓᓄᑦ. ᓘᑲᓯ ᐱᓇᓱᒐᖃᕐᓯᒪᓕᕐᑐᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᕙᑎᓕᕆᓂᕐᒨᓕᖓᔪᓂᒃ ᐆᒪᔪᓅᓕᖓᔪᓂᓪᓗ 1990-ᒥᓂᑦ, ᖃᐅᔨᓴᓲᖅ ᔦᒥᓯ ᐯᒥᒃ, ᑕᓯᐅᔭᕐᔪᐊᒥᒃ ᓄᕗᒻᒥᓗ. ᓘᑲᓯ ᓇᓗᓀᕐᑕᐅᒍᑎᑖᕐᓯᒪᔪᖅ ᐱᖓᓱᐃᓄᑦ ᐃᓕᓴᕐᓯᒪᓂᕐᒥᓄᑦ ᓴᓂᑭᓗᐊᕐᒥᐅᒍᖃᑎᖃᕐᓱᓂ ᐊᕐᓇᒥᓂᒃ ᓂᐊᓪᒥᒃ ᐃᕐᖑᑕᒥᓂᓪᓗ ᙯᔪᒥᒃ. ᐅᐱᒋᔭᒥᓂᓪᓗ ᐸᓂᖃᕐᓱᓂ ᒪᕐᕉᓂᒃ ᐅᑭᐅᖃᕐᑑᓂᒃ ᐊᕙᑎᓪᓗ ᖁᓕᓪᓗ ᐅᖓᑖᓅᕐᑐᓂᒃ ᐊᐅᔭᐅᓕᕐᒪᓗ ᒪᙯᒋᐊᒥᒃ ᐊᓕᐊᓲᒍᑦᓱᓂ.

ᐹᕆ ᕘᑦ - ᑲᑎᒪᔨᐅᖃᑕᐅᔪᖅ

ᑎᓕᔭᐅᓯᒪᓂᖓᑕ ᐃᓱᓕᕕᑦᓴᖓ: ᑎᓯᒻᐸ 17, 2023
ᓄᓇᓕᖓ: ᑰᑦᔪᐊᖅ, ᑯᐯᒃ
ᑎᓕᔨᔨᒋᓯᒪᔭᖏᑦ: CIRNAC ᐅᓐᓂᑐᑎᒋᓯᒪᔭᖓᓂᐅᒃ ᒪᑭᕝᕕᑯᑦ

ᐹᕆ ᕘᑦ, ᐱᕈᕐᓴᓯᒪᔪᖅ ᑰᑦᔪᐊᒥ, ᖃᐅᔨᓴᕐᑎᐅᓂᕐᒥᓂᒃ ᐱᓇᓱᓯᒋᐊᕐᓯᒪᔪᖅ ᓄᓇᕕᒻᒥ ᖃᐅᔨᓴᕐᕕᒥ ᐃᓓᓐᓇᓯᐅᑎᐅᑦᓱᓂ ᐱᓇᓱᐊᕐᓱᓂ ᐳᕐᑐᓂᕐᓴᒥᒃ ᐃᓕᓵᒍᑦᓱᓂ, ᓱᕐᖄᑎᕆᕙᑦᓱᓂ ᐃᖃᓗᓐᓂᒃ, ᐊᑐᐃᓐᓇᕈᕐᑎᕆᕙᑦᓱᓂ ᖃᐅᔨᓴᕋᑦᓴᓂᒃ ᑐᖁᓐᓇᑐᕐᑕᖃᕐᑐᖃᕐᒪᖔᑦ, ᕿᓚᓗᒐᕕᓂᕐᓂᒃ ᖃᐅᔨᓴᕋᑦᓴᑖᒍᓯᒪᔪᓂᒃ ᖃᐅᔨᓴᕐᐸᓱᓂ ᕿᓚᓗᒐᕐᓂᐊᓇᐅᑎᓪᓗᒍ, ᐃᑲᔪᕐᐸᓱᓂᓗ ᐊᕙᑎᐅᑉ ᓴᓗᒻᒪᓴᕐᑕᐅᓂᖓᓂᒃ ᐱᓇᓱᐊᕐᑐᓂᒃ. ᐃᓕᓴᕇᕐᓯᒪᔪᖅ ᐱᒍᓐᓇᐅᑎᑖᕐᓱᓂ B.Sc. ᐃᓕᓐᓂᐊᕕᕐᔪᐊᒥᑦ McGill University's Macdonald Campus ᑎᓯᒻᐸ 2005-ᒥ ᐅᑎᕐᓱᓂᓗ ᑰᑦᔪᐊᒧᑦ ᐱᓇᓱᒋᐊᕐᑐᓯᑦᓱᓂ ᐆᒪᔪᓂᒃ ᖃᐅᔨᓴᕐᑎᐅᓂᕐᒥᒃ ᒪᑭᕝᕕᒥ. ᐹᕆ ᐱᓇᓱᐊᖃᑕᐅᖃᑦᑕᓯᒪᔪᖅ ᑲᓇᑕᒥᐅᑦ ᑲᕙᒪᖓᑕ ᐱᓇᓱᐊᕐᑕᖏᓐᓂᒃ ᓯᓚᕐᔪᐊᓕᒫᒥ ᓇᓄᓕᕆᓂᐅᑉ ᐊᕐᕌᒍᖃᕐᑎᑕᐅᓂᖓᓂᒃ (IPY) ᓄᓇᕕᒻᒥ ᐊᐅᓚᑦᓯᔨᒋᔭᐅᑦᓱᓂ ᑰᑦᔪᐊᒥ ᑕᒪᑐᒥᖓ. ᑲᔪᓯᑎᑦᓯᒋᐊᖃᕐᓱᓂ ᖃᐅᔨᓴᕐᓂᐅᑉ ᐱᓇᓱᐊᕐᑕᐅᓂᖓᓂᒃ ᑐᑭᒧᐊᑦᑎᓯᒋᐊᖃᕐᐸᓱᓂ ᐃᑲᔪᕐᓯᒪᒋᐊᖃᕐᓱᓂᓗ IPY ᖃᐅᔨᓴᕐᑎᓂᒃ ᓄᓇᕕᒻᒥ. ᐹᕆ ᐊᐅᓚᑦᓯᔨᐅᓯᒪᔪᖅ ᑐᓴᐅᒪᑎᑦᓯᖃᑕᐅᒋᐊᖃᕐᓂᒥᒃ ᓄᓇᓕᒻᒦᑐᓂᒃ ᖃᐅᔨᓴᕐᓂᓅᓕᖓᔪᓂᒃ ᑐᓴᕐᕕᖃᕐᐸᓱᓂᓗ ᐃᓱᒪᒋᔭᖏᓐᓂᒃ ᓄᓇᓕᒻᒥᐅᑦ.

ᒪᑭᕝᕕᒥ ᐱᓇᓱᑦᑎᐅᓯᒪᓕᕐᑐᖅ ᐊᕐᕌᒍᓂ ᖁᓕᓪᓗ ᑕᓪᓕᒪᓪᓗᓂᒃ ᐊᑦᔨᒌᖕᖏᑐᓂᒃ ᐱᓇᓱᐊᕐᐸᓱᓂ ᐆᒪᔪᓂᒃ ᖃᐅᔨᓴᕐᑎᐅᓂᕐᒥᒃ, ᐅᔭᕋᕐᓂᐊᓂᕐᓄᑦ ᒪᓕᒐᕐᒥᒃ, ᓄᓇᓕᒻᒦᑐᓂᓪᓗ ᐱᓇᓱᖃᑎᖃᕐᓂᒥᒃ ᐊᑐᖃᑦᑕᕆᐊᖃᕐᓂᒥᓪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᐅᔨᓴᕐᓂᓂᒃ ᑲᔪᓯᑎᑦᓯᓂᕐᒥᓂ. ᑕᒐᑕᒐ ᐱᖕᖑᑐᑦᓴᓕᕆᓂᕐᒥᒃ ᐊᑕᐅᑦᓯᑰᕐᑎᓯᔨ ᐊᓪᓚᕕᒻᒥ ᐊᕙᑎᓕᕆᓂᕐᒧᑦ, ᐆᒪᔪᓕᕆᓂᕐᒧ, ᖃᐅᔨᓴᕐᓂᓄᓪᓗ.