ᖃᐅᔨᓴᕐᑕᐅᒋᐊᓖᑦ ᑭᖑᓂᖓᒍᑦ

ᕿᒥᕐᕈᕇᕈᑎᒃ ᕿᓄᒍᑎᓕᐊᒍᓯᒪᔪᒥᒃ, ᑲᑎᒪᔩᑦ NMRIRB ᑐᑭᑖᕆᔭᒥᓂᒃ ᑐᓴᕐᑎᓯᒍᑎᓕᐅᖃᑦᑕᓛᕐᑐᑦ ᑐᕐᖃᑕᕐᕕᒧᑦ ᐊᖏᕐᑎᐅᒋᐊᖃᓲᒧᑦ ᕿᓄᒍᑎᓕᐊᒍᔪᓂᒃ. ᑲᑎᒪᔩᑦ NMRIRB ᐅᓐᓂᑑᑎᓕᐅᕐᓯᒪᓛᕐᑐᑦ ᐊᕙᑎᒨᓕᖓᔪᑦ ᕿᒥᕐᕈᔭᐅᓯᒪᒋᐊᖃᕐᒪᖔᑕ, ᐱᓇᓱᑦᑕᐅᒍᒪᔪᕐᓘᓃᑦ ᑲᔪᓯᑎᑕᐅᔪᑦᓴᐅᒪᖔᑦ ᐅᓐᓂᑑᑎᓕᐅᕈᑕᐅᓯᒪᑎᓪᓗᒋᑦ ᐱᓇᓱᑦᑕᐅᔪᑦᓴᒨᓕᖓᔪᑦ ᒪᓕᒐᑦᓭᑦ. ᑲᑎᒪᔩᑦ NMRIRB ᕿᒥᕐᕈᔪᕕᓂᐅᑦᓱᑎᒃ ᑐᑭᑖᕆᓯᒪᔭᒥᓂᒃ ᑐᓴᕐᑎᓯᒍᑎᖏᑦ ᖃᕆᑕᐅᔭᒃᑯᑦ ᓇᐅᓕᒫᑦ ᐊᓪᓚᑕᐅᓯᒪᐅᑎᖏᓐᓅᓯᒐᔭᕐᑐᑦ ᖃᐅᔨᒪᑎᑦᓯᒍᑏᓪᓗ ᖃᕆᑕᐅᔭᒃᑯᑦ ᑐᓴᐅᒪᑎᑦᓯᒍᑎᓅᕐᑕᐅᓗᑎᒃ ᕿᒥᕐᕈᔭᐅᔪᑦᓴᓅᕐᑕᐅᓗᑎᒃ. ᐊᒥᓲᓂᕐᓭᑦ ᕿᓄᒍᑎᓕᐊᒍᓯᒪᔪᑦ ᕿᒥᕐᕈᔭᐅᓯᒪᑦᓱᑎᒃ ᐊᖏᕈᑕᐅᓲᑦ ᐅᓐᓂᑑᑎᓕᐊᒍᓯᒪᔪᑦ ᒪᓕᑦᑕᐅᒋᐊᓕᓐᓂᒃ ᐃᓚᐅᑎᓪᓗᒋᑦ ᑲᔪᓯᔭᑦᓴᐅᓱᑎᒃ, ᐊᕙᑎ ᐃᓘᓐᓈᒍᑦ ᕿᒥᕐᕈᔭᐅᓂᖃᕆᐊᖃᓲᒍᒻᒪᑦ ᐱᓪᓚᕇᑦ ᐱᓇᓱᐊᕐᑕᐅᓚᖓᑉᐸᑕ, ᐃᓱᒫᓗᒋᔭᐅᔪᑦ ᓇᐅᓕᒫᓄᑦ, ᐱᓇᓱᑦᑕᐅᔪᑦᓭᓗ ᓄᑖᓂᒃ ᐃᓱᕐᕉᑎᓂᒃ ᐊᑐᕈᑕᐅᓚᖓᔪᑦ ᖃᓄᖅ ᓱᕐᕃᓂᕆᒐᔭᕐᑕᖏᑦ ᖃᐅᔨᒪᔭᐅᒐᑎᒃ.

ᑲᕙᒪᑐᖃᒃᑯᑦ ᓄᓇᓯᒪᔪᓪᓗ ᑲᕙᒪᖏᑦ, ᒪᑭᕝᕕᐅᑉ ᑎᓕᓯᒪᔭᖏᑦ ᐱᓇᓱᕝᕖᑦ ᐊᓯᖏᓪᓗ ᐱᓇᓱᕝᕖᑦ ᐊᐅᓚᑦᓯᓲᑦ ᐱᒍᓐᓇᑎᑦᓯᓲᓪᓗ ᕿᓄᒍᑕᐅᓯᒪᔪᓂᒃ ᐱᓇᓱᑦᑕᐅᔪᑦᓴᓂᒃ “ᐊᖏᕈᓐᓇᐅᑎᖃᕐᓱᑎᒃ ᐱᓇᓱᕝᕕᐅᓂᕋᕐᑕᐅᕗᑦ”. ᑐᕐᖃᑕᕖᑦ ᑕᒪᑐᒥᖓ ᑲᒪᒋᔭᑦᓴᓖᑦ ᐊᓪᓚᓯᒪᔫᑎᓪᓗᒋᑦ, ᓄᐃᑦᓯᒋᐊᓖᑦ ᑐᑭᑖᕈᑎᒋᔭᒥᓂᒃ ᐊᖏᕈᑎᒃ, ᐊᖏᖕᖏᑯᑎᓪᓘᓃᑦ ᐅᓐᓂᑑᑎᖏᓐᓂᒃ ᑲᑎᒪᔩᑦ NMRIRB. ᑐᑭᑖᕈᑕᐅᓯᒪᔪᖅ ᑐᓂᔭᐅᓯᒪᓕᕐᐸᑦ, ᐊᖏᕈᓐᓇᐅᑎᓖᑦ ᐱᒍᓐᓇᐅᑎᑖᕐᑎᓯᓂᐊᓕᕐᒪᑕ ᐊᖏᕈᑎᖃᕐᓗᑎᓪᓗ ᒪᓕᓪᓗᒍ ᐱᓇᓱᒍᓯᕆᓲᖓ.

ᑲᑎᒪᔩᑦ NMRIRB ᐃᑉᐱᒍᓲᑎᑦᓴᓕᐅᕈᓐᓇᒥᔪᑦ ᐱᓇᓱᑦᑕᐅᔪᑦᓴᓂᒃ ᑲᒪᒋᔭᑦᓴᕆᒋᐊᓕᖏᓐᓂᒃ ᕿᓄᒍᑎᓕᐅᕐᓯᒪᔪᑦ, ᑲᑎᒪᔨᓄᑦ NMRIRB, ᑲᕙᒪᓄᓪᓘᓃᑦ.  ᐃᑉᐱᒋᔭᐅᒍᑎᑦᓴᖏᑦ ᐱᓇᓱᑦᑕᐅᔪᑦᓭᑦ ᐊᖏᕈᑕᐅᓯᒪᒋᐊᓖᑦ ᑲᑎᒪᔨᓄᑦ NMRIRB  ᕿᒥᕐᕈᔭᐅᒌᕐᓯᒪᑉᐸᑕ ᒪᓂᔨᒍᑕᐅᒋᐊᓖᑦ ᐊᕐᕌᒍᑕᒫᕐᓯᐅᑎᒥᒃ ᑐᓴᕐᑎᓯᒍᑎᓂᒃ ᐊᓯᖏᓐᓂᓘᓐᓃᑦ ᕿᒥᕐᕈᔭᐅᒌᕐᓯᒪᔪᓂᒃ.