ᐱᓇᓱᑦᑕᐅᔪᑦᓭᑦ ᖃᐅᔨᓴᕐᑕᐅᓯᒪᒋᐊᓖᑦ
ᐱᓇᓱᑦᑕᐅᔪᑦᓴᖁᑎᖃᕈᒪᔪᑦ ᓄᓇᕕᐅᑉ ᑕᕆᐅᖓᓂ ᕿᓄᒍᑎᓕᐅᕆᐊᓖᑦ ᓄᓇᕕᐅᑉ ᑕᕆᐅᖓᓂ ᐸᕐᓀᓂᕐᒧᑦ ᐱᓇᓱᐊᕐᑎᓄᑦ ᒪᓕᒐᑎᒎᑦᓯᐊᒪᖔᑦ ᐱᓇᓱᑦᑕᐅᒍᒪᔪᖅ ᐊᖏᕈᑕᐅᓯᒪᔪᓄᑦ ᓄᓇᐅᑉ ᐊᑐᕐᑕᐅᒍᓐᓇᓂᖓᑕ ᐸᕐᓀᕈᑎᑎᒍᑦ, ᐊᓱᐃᓛᒍᑦᓴᐸᑦ, ᐱᓇᓱᑦᑕᐅᒍᒪᔪᖅ ᖃᐅᔨᓴᕐᑕᐅᖏᑦᑑᖃᑕᐅᒋᐊᖃᕐᒪᖔᑦ ᕿᒥᕐᕈᖃᑦᑕᕆᐊᖃᕐᓂᖏᓐᓄᑦ ᑲᑎᒪᔩᑦ NMRIRB. ᓄᓇᕕᐅᑉ ᑕᕆᐅᖓᓂ ᐸᕐᓀᓂᕐᒧᑦ ᐱᓇᓱᐊᕐᑏᑦ ᐱᕕᑦᓴᖃᕐᕕᖃᕐᑎᑕᐅᓲᒍᒻᒪᑕ ᐃᓱᒪᑦᓴᓯᐅᕈᑎᖃᕆᐊᖃᕐᓂᒧᑦ ᐱᓇᓱᑦᑕᐅᒍᒪᔪᓂᒃ ᕿᓄᒍᑎᓕᐊᒍᓯᒪᔪᓂᒃ. ᓄᓇᕕᐅᑉ ᑕᕆᐅᖓᓂ ᐸᕐᓀᓂᕐᒧᑦ ᐱᓇᓱᐊᕐᑏᑦ ᖃᐅᔨᒋᐊᕐᕕᐅᒍᓐᓇᑐᑦ ᖃᕆᑕᐅᔭᒃᑯᑦ ᑐᓴᕋᑦᓴᖃᕐᕕᒥᑎᒍᑦ www.nmrpc.ca ᐱᓇᓱᑦᑕᐅᔪᑦᓴᖁᑎᖃᕈᒪᔪᑦ ᖃᐅᔨᒋᐊᕐᕕᒋᒍᓐᓇᑕᖓᓂᒃ ᖃᓄᖅ ᕿᓄᒍᑎᓕᐅᕈᓐᓇᒪᖔᕐᒥᒃ ᐊᒻᒪᓗ ᓄᓇᓀᑦ ᐊᑐᕐᑕᐅᒍᓯᖓᑕ ᐸᕐᓀᑕᐅᓯᒪᐅᑎᖏᑦᑕ ᐊᑐᕐᑕᐅᒍᓐᓇᓂᖏᓐᓂᒃ.
ᐊᖏᖃᑎᒌᒍᑎ NILCA ᐱᕕᑦᓴᖃᕐᑎᓯᒍᓐᓇᓲᖅ ᐱᓇᓱᑦᑕᐅᔪᑦᓴᓂᒃ ᐃᓚᖏᓐᓂᒃ ᕿᒥᕐᕈᔭᐅᖕᖏᑑᑎᑦᓯᒍᓐᓇᓱᑎᒃ ᑲᑎᒪᔨᖏᓐᓄᑦ NMRIRB. ᐊᓱᐃᓛᒃ ᕿᒥᕐᕈᔭᐅᖕᖏᑑᓯᒪᔪᓂᒃ ᓄᓇᕕᐅᑉ ᑕᕆᐅᖓᓂ ᐸᕐᓀᓂᕐᒧᑦ ᐱᓇᓱᐊᕐᑏᑦ ᒪᓂᔨᓂᐊᕈᓐᓀᒪᑕ ᕿᓄᒍᑎᓂᒃ ᑲᑎᒪᔨᖏᓐᓄᑦ NMRIRB. ᓄᓇᕕᐅᑉ ᑕᕆᐅᖓᓂ ᐸᕐᓀᓂᕐᒧᑦ ᐱᓇᓱᐊᕐᑏᑦ ᐃᓱᒫᓗᒋᔭᖃᖕᖏᐸᑕ ᓱᕐᕃᓂᕆᒍᓐᓇᑕᖏᓐᓂᒃ ᐊᓯᖏᓐᓂᒃ ᐱᓇᓱᐊᕐᑕᐅᔪᓂᒃ ᐸᕐᓀᕕᐅᔪᒥ ᓄᓇᒥ. ᑌᒫᑦᓭᓇᖅ, ᑲᑎᒪᔩᑦ NMRIRB. ᕿᒥᕐᕈᓂᖃᖃᑦᑕᓛᖕᖏᒪᑕ ᐱᓇᓱᑦᑕᐅᔪᑦᓴᓂᒃ ᑐᑭᐊᒎᖕᖏᑐᓂᒃ ᓄᓇᐅᑉ ᐊᑐᕐᑕᐅᓂᖓᑕ ᐸᕐᓀᕈᑏᑦ ᕿᒥᕐᕈᕈᓐᓇᐅᑎᓂᒃ ᐱᑎᑕᐅᓯᒪᖕᖏᑯᑎᒃ ᐊᖏᕈᑕᐅᑉᐸᓘᓐᓃᑦ ᐊᓯᑦᔩᒋᐊᕈᑎᒃ.
ᐱᓇᓱᑦᑕᐅᔪᑦᓭᑦ ᕿᒥᕐᕈᔭᐅᕐᖄᕆᐊᖃᖕᖏᑐᑦ ᑲᑎᒪᔨᓄᑦ NMRIRB:
1. ᓄᓇᐅᑉ ᐊᑐᕐᑕᐅᓂᖓᓅᓕᖓᔪᑦ ᐊᖏᕈᑕᐅᕐᖄᓯᒪᒋᐊᖃᕋᑎᒃ ᑲᓇᑕᒥᐅᑦ ᑲᕙᒪᖓᓄᑦ ᓄᓇᓯᒪᔪᓪᓗ ᑲᕙᒪᖓᓄᓪᓘᓃᑦ;
2. ᓄᓇᐅᑉ ᐊᑐᕐᑕᐅᓂᖓᓅᓕᖓᔪᑦ ᐱᒍᓐᓇᐅᑎᖃᕈᑕᐅᒋᐊᓖᑦ Class B-ᒥᑐᐊᖅ ᓄᓇᓯᒪᔪᑦ ᑲᕙᒪᖓᑕ ᓄᓇᐅᑉ ᐊᑐᕐᑕᐅᓂᖓᓄᑦ ᒪᓕᒐᓕᖏᑎᒎᕐᑐᑦ (SOR/77-210 4 ᒫᑦᓯ 1977);
3. ᓴᓇᓂᓕᒫᑦ, ᐊᐅᓚᑕᐅᓂᖏᓪᓗ ᓯᖁᒥᓯᒪᔪᕐᓂᐊᑕᐅᓂᖏᓪᓗ ᐃᓪᓗᖁᑎᓕᒫᑦ ᐱᒍᑦᔭᐅᒍᑎᖏᓪᓗ ᓄᓇᓕᓐᓂ, ᐃᓚᐅᑎᓐᓇᒋᑦ ᐅᕐᓱᐊᓗᖃᐅᑎᖃᕐᕖᑦ, ᐃᑯᒪᐅᑎᓕᐅᕈᑏᑦ ᐅᕐᓱᖃᓲᑦ nuclear-ᒍᓂᕋᕐᑕᒥᒃ, ᐅᕝᕙᓘᓐᓃᑦ ᐃᒪᕐᒥᒃ ᐃᑯᒪᐅᑎᖃᕈᑏᑦ ᐱᓇᓱᐊᕐᑕᐅᔪᐃᓪᓗ ᐱᓇᓱᕝᕕᒪᕆᓐᓂ;
4. ᓯᓂᑦᑕᕕᓕᒫᑦ, ᓯᓂᑦᑕᕕᓕᒫᓪᓗ ᐃᑭᓐᓂᓴᓂᒃ ᖃᕆᐊᓖᑦ, ᑕᑯᔭᕐᑐᓯᒪᔪᓄᓪᓗ ᐃᓪᓗᖁᑏᑦ ᐃᓪᓕᖃᕐᑐᑦ ᐊᕙᑎᓂᒃ (2) ᐃᑭᓐᓂᓴᓂᓪᓘᓃᑦ ᓄᓇᓕᐅᑉ ᓯᓚᑖᓃᑦᓱᑎᒃ;
5. ᐃᒪᐅᑉ ᐊᑐᕐᑕᐅᓂᖏᑦ ᐃᓄᓕᒫᕐᑎᓯᒍᑕᐅᒋᐊᖃᖕᖏᑐᑦ ᐅᖃᐅᓯᕐᑕᖏᑎᒍᑦ 13.7.3-ᒥ ᐅᕙᓃᑦᑐᓂ NLCA;
6. ᐅᔭᕋᕐᓂᐊᕋᑦᓴᓯᐅᕐᓂᖅ, ᓇᓗᓀᒃᑯᓯᕐᑐᐃᓂᖅ ᓇᓃᓐᓂᖏᓐᓂᒃ ᐅᔭᕋᕐᓂᐊᕋᑦᓴᑖᕐᓯᒪᔪᐃᓪᓗ ᐃᓐᓄᐃᓯᒪᒍᑎᖏᑦ ᐱᒍᓐᓇᐅᑎᖃᕈᑕᐅᒋᐊᖃᕐᐸᑕ Class B -ᓚᔭᐅᔪᒥᒃ ᐊᓯᒋᐊᓪᓚᖓᓂᓪᓗ 2-ᒦᑦᑐᓂ ᐊᓪᓚᑕᐅᓯᒪᔪᓂ;
7. ᐱᓇᓱᐊᕐᑕᐅᒋᐊᓖᓪᓗ ᐊᓯᖏᑦ ᐊᖏᕈᑕᐅᓯᒪᔪᑦ ᑲᑎᒪᔨᓄᑦ NMRIRB ᑐᕐᖃᑕᕐᕕᖏᓐᓄᓗ.
ᑲᑎᒪᔩᑦ NMRIRB ᖃᐅᔨᓴᕐᓂᕆᓲᖓ ᑐᑭᓯᓴᕐᓂᐅᒋᐊᖃᕐᓯᒪᔪᖅ ᐱᓇᓱᐊᕐᑕᐅᒍᒪᔪᑦ ᕿᒥᕐᕈᓂᕐᑕᖃᕆᐊᖃᕐᒪᖔᑕ ᐊᕙᑎᒨᓕᖓᔪᓂᒃ ᑲᔪᓯᔭᐅᑐᐃᓐᓇᕈᓐᓇᒪᖔᑕᓘᓐᓃᑦ ᐱᓇᓱᑦᑕᐅᒍᒪᔪᑦ ᐱᒍᓐᓇᐅᑎᑖᕈᑕᐅᓗᑎᓪᓗ, ᐊᖏᕈᑕᐅᓗᑎᓪᓗ ᕿᒥᕐᕈᒋᐊᓪᓚᓂᖃᕐᖄᑎᓐᓇᒍ.
ᑲᑎᒪᔩᑦ ᕿᒥᕐᕈᓯᒪᔭᒥᓂᒃ ᑐᓴᕐᑎᓯᒍᑎᖏᑦ ᑐᕃᓐᓇᑎᑕᐅᑦᓱᑎᒃ ᑐᕐᖃᑕᕐᕕᒨᕐᑕᐅᓲᑦ ᑲᒪᒋᔭᑦᓴᓕᓐᓄᑦ ᐊᖏᕈᑎᖃᕆᐊᖃᕐᓂᒥᒃ ᕿᓄᒍᑎᓕᐊᒍᓯᒪᔪᓂᒃ ᐃᓚᖃᕐᑎᓗᒋᑦ ᓱᓇᒥᑦᑐᒥᒃ ᕿᒥᕐᕈᕈᑎᒋᓯᒪᔭᓂᒥᒃ ᕿᓄᒍᑎᓕᐊᕕᓂᕐᓂᒃ ᓱᕐᕃᓂᕆᑐᐃᓐᓇᕆᐊᓕᖏᓐᓂᓗ ᐆᒪᔪᐃᑦ ᓇᔪᓲᖏᓐᓂᒃ ᐊᒻᒪᓗ ᐃᓅᓯᒃᑯᑦ-ᒪᑭᑕᒐᓱᐊᕐᓂᑯᓪᓗ ᓱᕐᕃᓂᕆᑐᐃᓐᓇᕆᐊᓕᖏᓐᓂᒃ ᓄᓇᕕᐅᑉ ᑕᕆᐅᖓᓂᒃ. ᑲᑎᒪᔩᑦ ᕿᒥᕐᕈᕆᐊᖃᕐᓂᐸᑕ, ᐊᖏᕈᑎᖃᕐᓯᒪᔪᑦ ᐱᓇᓱᕝᕖᑦ ᐱᒍᓐᓇᐅᑎᑖᕐᑎᓯᖃᑦᑕᕆᐊᖃᖕᖏᑐᑦ ᐊᖏᕈᑎᖃᕆᐊᖃᕋᑎᓪᓗ ᐱᓇᓱᑦᑕᐅᒍᒪᔪᓂᒃ ᑲᑎᒪᔩᑦ NMRIRB ᕿᒥᕐᖁᕇᕐᖄᓚᐅᕐᑎᓇᒋᑦ.
2020-ᒥ ᐱᒋᐊᕐᓱᒍ, ᕿᓄᒍᑎᓕᐅᕈᒪᔪᑦ ᑐᑭᓯᒪᐅᑎᑦᓴᓕᒫᓂᒃ ᐃᓚᐅᑎᑦᓯᖃᑦᑕᕆᐊᓖᑦ ᑲᑎᒪᔨᓄᑦ NMRIRB ᕿᒥᕐᕈᔭᐅᔪᑦᓴᓂᒃ ᐱᓇᓱᑦᑕᐅᒍᒪᔪᓅᓕᖓᑦᓱᑎᒃ. ᑲᑎᒪᔩᑦ ᒫᑦᓯ 2022 ᐃᓱᓕᓂᖓᓂ, ᕿᓄᒍᑎᓕᐅᕈᒪᔪᓂᒃ ᖃᕆᑕᐅᔭᒃᑯᑦ ᐊᓪᓚᒍᑎᖃᖃᑦᑕᕆᐊᖃᓛᕐᓂᕃᔪᑦ ᕿᓄᒍᑎᓕᐅᕐᓗᑎᒃ ᖃᕆᑕᐅᔭᒧᑦ ᑲᑎᒪᔩᑦ NMRIRB ᓇᐅᓕᒫᓂᒃ ᕿᓄᒍᑎᓕᐅᕐᕕᓴᖃᕐᑎᓯᕕᖓᓄᑦ. ᑲᑎᒪᔩᑦ NMRIRB ᕿᓄᒍᑎᓕᐅᕈᓯᖓ ᐅᓪᓗᑐᖃᑦᑕᕈᓇᖅ 45-ᓂᒃ ᓇᐅᓕᒫᓄᓪᓗ ᐅᖃᐅᓯᑦᓴᖃᕐᕕᐅᒍᓐᓇᕋᔭᕐᓱᑎᒃ. ᐊᑭᖃᖕᖏᑐᒥᒃ ᕿᒥᕐᕈᓂᖃᓲᑦ ᑲᑎᒪᔩᑦ ᑭᓯᐊᓂ NMRIRB ᕿᓄᒍᑎᓕᐅᕈᒪᔪᑦ ᑐᑭᓯᒪᔭᐅᒋᐊᓕᓕᒫᓂᒃ ᐊᑐᐃᓐᓇᐅᑎᑦᓯᓯᐊᖃᑦᑕᕆᐊᓖᑦ ᐃᓄᒃᑎᑑᓕᕐᑎᑕᐅᓯᒪᑦᓯᐊᑎᓪᓗᒋᑦ.
