ᐃᓚᐅᖃᑦᑕᓂᖅ
ᓇᐅᓕᒫᑦ ᐃᓚᐅᖃᑦᑕᑎᓪᓗᒋᑦ ᑲᖐᓱᑦᑎᓯᓂᖃᑦᓯᐊᕈᓐᓇᖃᑦᑕᓚᖓᕗᑦ ᑲᑎᒪᔩᑦ NMRIRB ᐱᓪᓚᕆᖁᑎᐅᔪᓂᒃ ᓱᕐᕋᑕᐅᒍᓐᓇᑐᓂᒃ ᕿᓄᒍᑕᐅᓯᒪᔪᓄᑦ ᐱᓇᓱᑦᑕᐅᒍᒪᒐᔭᕐᓱᑎᒃ. ᐃᓚᐅᑦᓯᐊᖃᑦᑕᓱᓂ ᐅᒃᑯᐃᖔᕐᓂᖃᑦᓯᐊᑐᒥᒃ ᐱᓇᓱᖃᑎᒌᑦᓯᐊᓂᕐᑕᓕᒻᒥᓗ ᐱᓇᓱᒍᓯᖃᕐᓇᓲᒍᕗᖅ ᓲᖑᓯᑎᑦᓯᒋᐊᕐᓇᑐᓕᒻᒥᒃ ᐱᑦᓯᐊᑕᐅᒋᐊᖃᕐᓂᖓᓂᒃ ᕿᒥᕐᕈᓂᐅᑉ ᑐᑭᓯᑎᑦᓯᒍᑎᑦᓯᐊᒍᓂᐊᕐᑐᒥᓪᓗ ᑐᑭᑖᕋᓱᐊᕆᐊᓕᓐᓂᒃ, ᑐᑭᑖᑦᓯᐊᕈᓐᓇᑐᖃᖃᑦᑕᓂᐊᕐᒪᑦ ᐱᐅᓂᕐᓴᓂᓪᓗ ᐱᓇᓱᐊᕐᑕᐅᔪᑦᓴᖃᖃᑦᑕᕈᓐᓇᓂᐊᕐᒪᑦ.
ᕿᒥᕐᕈᑐᖃᕐᓱᓂ ᐱᓇᓱᐊᕐᑕᐅᒍᒪᒐᔭᕐᑐᒥᒃ ᐊᕙᑎᒥᒃ ᕿᒥᕐᕈᓂᕐᑕᖃᕆᐊᖃᕐᒪᖔᑦ, ᑲᑎᒪᔩᑦ NMRIRB ᐃᑉᐱᒋᔭᖃᕆᐊᖃᕆᕗᑦ ᐱᓇᓱᑦᑕᐅᔪᑦᓴᖅ ᐃᓱᒫᓘᑎᐅᓚᖓᒻᒪᖔᑦ ᓇᐅᓕᒫᓄᑦ; ᑕᒪᓐᓇ ᖃᐅᔨᔭᐅᒍᓐᓇᓲᖅ, ᐃᓚᖓᒍᑦ, ᐃᓱᒪᒋᔭᐅᔪᓂᒃ ᑐᓴᕐᑐᖃᖃᑦᑕᓱᓂ ᕿᒥᕐᕈᓂᖃᕐᑎᓗᒍ.
ᑲᑎᒪᔩᑦ NMRIRB ᐃᓱᒪᒋᓕᐅᑦᔨᓯᒪᓲᑦ ᐆᒪᔪᐃᑦ ᐱᕈᕐᑐᐃᓗ ᓇᔪᓲᖏᑦᑕ ᓱᕐᕋᑕᐅᓂᕆᑐᐃᓐᓇᕆᐊᓕᖏᓐᓂᒃ (ᐆᑦᑐᕋᐅᑎᒃᑲ ᓄᓇ, ᐊᓂᕐᑎᕆᔭᕗᑦ, ᐃᒪᖅ, ᐃᖃᓗᐃᑦ, ᐆᒪᔪᐃᓪᓗ) ᓱᕐᕋᑕᐅᓂᐅᑐᐃᓐᓇᕆᐊᓖᓪᓗ ᐃᓅᓯᒃᑯᑦ-ᒪᑭᑕᒐᓱᐊᕐᓂᑯᓪᓗ (ᐅᑦᑐᕋᐅᑎᒃᑲ ᖃᓄᐃᖕᖏᓯᐊᕐᑐᓴᐅᓂᖓ ᐃᓄᐃᑦ ᓄᓇᓖᓪᓗ) ᐱᓇᓱᐊᕐᑕᐅᒍᒪᒐᔭᕐᑐᓄᑦ ᐊᕙᑎᒥᒃ ᓱᕐᕃᓂᖃᑐᐃᓐᓇᕆᐊᖃᕐᒪᖔᑕ. ᐅᖃᐅᓯᑦᓴᕕᓂᓯ ᐊᑑᑎᖃᑦᓯᐊᖃᑦᑕᓂᐊᕐᒪᑕ NIRB-ᑯᓐᓄᑦ, ᑌᓯᓯᒪᒋᐊᖃᕐᐳᓯ ᐱᓪᓚᕆᖁᑎᒋᔭᕐᓂᒃ ᐆᒪᔪᐃᑦ ᓇᔪᓲᖏᓐᓅᓕᖓᔪᓂᒃ ᐃᓅᓯᕐᒨᓕᖓᔪᓂᓪᓗ ᒪᑭᑕᒐᓱᐊᕐᓂᒨᓕᖓᔪᓂᓪᓗ ᑐᑭᓯᓇᕐᑎᓗᒋᓪᓗ ᖃᓄᖅ ᑖᒃᑯᐊ ᐱᓪᓚᕆᖁᑎᐅᔪᑦ ᓱᕐᕋᑕᐅᓂᖃᑐᐃᓐᓇᕆᐊᖃᕐᒪᖔᑕ ᐱᓇᓱᐊᕐᑕᐅᒍᒪᒐᔭᕐᑐᓄᑦ.
ᐅᖃᐅᓯᑦᓴᕆᔭᐅᔪᑦ ᖃᓄᖅ ᐃᓱᒪᒋᓕᐅᑎᔭᐅᕙᑉᐸᑦ ᕿᒥᕐᕈᓂᖃᓕᑐᐊᕐᒪᑦ ?
ᑐᑭᓯᒪᐅᑎᑦᓭᑦ ᑐᓴᕐᑎᓯᒍᑕᐅᓯᒪᔪᑦ ᐱᓇᓱᐊᖃᑕᐅᒍᒪᔪᓂᒃ ᓇᐅᓕᒫᓂᓪᓗ ᐊᑦᔨᒌᑦᑐᒥᒃ ᐃᓘᓐᓈᒍᑦ ᐊᑦᔨᒌᑦᑎᓯᓂᖃᕐᑐᒥᓪᓗ ᐃᓱᒪᑦᓴᓯᐅᕈᑎᐅᖃᑦᑕᓛᕐᖁᑦ ᕿᒥᕐᕈᓂᖃᓕᑐᐊᕐᐸᑕ ᑲᑎᒪᔩᑦ NMRIRB. ᑕᒪᓐᓇ ᑐᑭᓕᒃ ᐃᓕᔭᐅᑦᓯᐊᖃᑦᑕᓛᕐᑎᓗᒋᑦ, ᐆᑦᑐᕋᑎᒌᑦᑎᓯᒍᑕᐅᖃᑦᑕᓗᑎᓪᓗ, ᐃᓱᒪᒋᔭᐅᓯᒪᔪᓄᑦ ᐊᓯᓕᒫᖏᓐᓄᑦ ᑐᑭᓯᑎᑦᓯᒍᑎᐅᓯᒪᔪᓂᓪᓗ ᕿᒥᕐᕈᓂᖃᓕᕐᐸᑕ. ᑲᑎᒪᔩᑦ NMRIRB ᐊᑦᔨᒌᖕᖏᑐᓂᒃ ᖃᐅᔨᓴᐅᑎᑦᓴᖃᓲᑦ ᐃᓱᒪᑦᓴᓯᐅᕐᓱᑎᒃ ᑐᑭᓯᒪᐅᑎᑦᓭᑦ ᐊᑐᕋᑦᓴᓯᐊᒍᒻᒪᖔᑕ. ᑐᑭᓯᒪᐅᑎᑦᓭᑦ ᑲᑎᕐᓱᑕᐅᓯᒪᔪᑦ ᕿᒥᕐᕈᓂᖃᕐᑎᓗᒍ ᓱᕐᕃᓂᖃᕈᓐᓇᐳᑦ ᕿᒥᕐᕈᔭᐅᒋᐊᖃᕐᓂᐹᓂᒃ ᐅᓐᓂᑑᑎᐅᔪᓂᓪᓗ ᕿᒥᕐᕈᓂᐅᑉ ᐃᓱᓕᓂᖓᓂ.
ᐃᓄᓕᒫᕐᑎᓯᖃᑦᑕᓃᑦ
ᐃᓚᒋᔭᐅᑎᓪᓗᒍ ᐊᓪᓚᓯᒪᔪᓂᒃ ᐅᖃᐅᓯᑦᓴᓂᒃ ᒪᓂᔨᒍᓐᓇᓂᕐᒧᑦ NIRB-ᑯᓐᓄᑦ ᐃᓱᒪᑦᓴᓯᐅᕈᑎᑦᓴᐅᓂᐊᕐᑐᓂᒃ, ᑲᑎᒪᔩᑦ NMRIRB ᕿᒥᕐᕈᕆᐊᑦᓯᐊᓂᖏᑎᒍᑦ ᐃᑉᐱᒋᔭᖃᕐᓂᒥᓪᓗ ᐱᓇᓱᐊᕐᐸᑕᖏᓐᓄᑦ ᐱᕕᑦᓴᐅᕙᑉᐳᖅ ᐃᓄᐃᑦ ᐃᓚᒋᔭᐅᒍᓐᓇᓱᑎᒃ ᐃᓄᓕᒫᑦ ᑲᑎᒪᓂᖏᓐᓄᑦ, ᑐᑭᓯᒪᖃᑎᒌᒋᐊᕐᑐᑐᓄᑦ, ᓄᓇᓕᒻᒥ ᑲᑎᒪᓂᕐᓄᑦ, ᑲᑎᒪᓂᐊᕈᓯᕐᓄᑦ ᑭᓪᓕᓯᓂᐊᕐᓂᓄᓪᓗ. ᑲᑎᒪᔩᑦ NMRIRB ᑕᒪᒃᑯᓂᖓ ᓱᑎᑦᓯᓂᖃᕐᑎᓯᓲᑦ ᓄᓇᓕᓐᓂ ᓱᕐᕋᑕᐅᑐᐃᓐᓇᕆᐊᓕᒻᒦᑐᓂᒃ ᐱᓇᓱᐊᕐᑕᐅᒍᒪᓯᒪᔪᓄᑦ ᐃᓄᓕᒫᓂᓪᓗ ᐃᓚᐅᑦᓯᐊᖃᑦᑕᖁᔨᑦᓱᑎᒃ ᓱᑎᑦᓯᓂᐅᔪᓄᑦ. ᑲᑎᒪᔩᑦ NMRIRB ᑲᑎᒪᓂᕆᓛᕐᑕᓕᒫᖏᑦ ᓯᕗᓂᖓᒍᑦ ᖃᐅᔨᒪᑎᑦᓯᒍᑎᐅᓲᑦ ᑐᓵᔨᖃᓲᒍᑦᓱᑎᓪᓗ ᑲᑎᒪᓕᕋᒥᒃ ᐊᖑᒪᑦᓯᓱᑎᒃ ᑐᓵᔨᓂᒃ ᑐᑭᓯᔭᐅᑦᓯᐊᕈᒪᒐᒥᒃ.