ᓄᓇᕕᒻᒥ ᒪᓕᒐᖃᕐᓂᖅ

ᓄᓇᕕᒃ ᐃᓄᖃᕐᐳᖅ 10,000 ᐅᖓᑖᓅᕐᑐᓂᒃ, ᓯᑦᔭᒥᐅᓂᒃ ᓄᓇᓕᓐᓂ: ᑲᖏᕐᓱᐊᓗᑦᔪᐊᖅ (George River), ᑰᑦᔪᐊᖅ (Fort Chimo), ᑕᓯᐅᔭᖅ (Leaf Bay), ᐊᐅᐸᓗᒃ, ᑲᖏᕐᓱᖅ (Payne Bay), ᖁᐊᕐᑕᖅ, ᑲᖏᕐᓱᔪᐊᖅ, ᓴᓪᓗᐃᑦ, ᐃᕗᔨᕕᒃ, ᐊᑯᓕᕕᒃ, ᐳᕕᕐᓂᑐᖅ, ᐃᓄᒃᔪᐊᖅ (Port Harrison), ᐅᒥᐅᔭᖅ, ᑰᑦᔪᐊᕌᐱᒃ (Great Whale River), ᓯᓵᓯᐱᓗ (ᐃᓄᐃᑦ ᓄᓇᓕᖓ ᐊᓪᓓᑦ ᑯᔩᒃᑯᑦ ᓄᓇᓕᖓᓂᒥᐅᑦ ᓄᓇᕕᐅᑉ ᓯᓚᑖᓃᑦᓱᑎᒃ).

ᓄᓇᕕᒻᒥ ᓄᓇᓖᑦ ᐅᖓᓯᓐᓂᓖᑦ 1500-ᑭᓗᒦᑕᓂᑦ 2500-ᑭᓗᒦᑕᓄᑦ ᒪᓐᑐᕆᐊᓪ ᑕᖅᕋᖓᓃᑦᓱᑎᒃ. ᐱᖓᓱᑦ ᓄᓇᓖᑦ ᐃᓄᒋᐊᓐᓂᓖᑦ 1000-ᐅᖓᑖᓅᕐᑐᓂᒃ. 90%-ᒦᑲᓵᑦᑐᑦ ᓄᓇᕕᒻᒥᐅᒍᑦᓱᑎᒃ ᐃᓄᐃᑦ. ᐊᕐᖁᑎᖃᖕᖏᑐᖅ ᓄᓇᓖᑦ ᐊᑯᓐᓂᖏᓐᓂ, ᐊᕐᖁᑎᖃᕋᓂᓗ ᓄᓇᕕᒻᒥᑦ ᓯᕿᓂᕐᒧᑦ. ᖃᖓᑦᑕᔫᒃᑯᑦ ᑭᓯᐊᓂ ᐊᕐᕌᒍᓕᒫᖅ ᐱᒍᑦᔭᐅᓲᑦ ᐊᐅᔭᐅᓕᕐᒪᓗ ᐅᒥᐊᕐᕈᐊᑯᑦ ᐅᓯᒍᑦᔭᐅᓲᒍᑦᓱᑎᒃ ᖃᖓᑦᑕᔫᒃᑯᓗ ᐅᓯᒍᑦᔭᐅᓲᒍᑦᓱᑎᒃ ᑭᖕᖒᒪᒋᔭᒥᓂᒃ. ᓄᓇᕕᒻᒥ ᐃᓅᒐᓱᐊᕈᑎᑦᓭᑦ ᐊᑭᑐᓂᕐᓭᑦ 69%-ᒧᑦ ᑯᐯᒻᒦᑐᓄᑦ ᐆᑦᑐᕋᐅᑎᒋᔭᐅᑎᒍᑦᑎᒋᑦ. 2001-ᒥ ᑲᓇᑕᒥ ᑭᑎᑦᔪᑎᓕᕆᔩᑦ ᑐᓴᕐᑎᓯᒍᑎᕕᓂᖏᓐᓂ ᐊᖑᓇᓱᓐᓂᒧᑦ ᓄᓇᓕᒥᓪᓗ ᒪᑭᑕᑦᓯᐊᑐᑦᓴᐅᓂᕐᒧᑦ ᐃᓄᑦᑎᒍᑦ ᓄᐃᑕᐅᓯᒪᕗᑦ ᐊᑭᖏᑦ ᓂᖀᑦ ᐱᔭᐅᓲᒍᓂᕐᐹᑦ ᑰᑦᔪᐊᒥ ᐊᑭᖏᑦ 2.4-ᕕᓪᓗᐊᑐᒥᒃ ᐊᑭᑐᓂᕐᓴᐅᑎᓪᓗᒋᑦ ᒪᓐᑐᕆᐊᒥ ᓂᖀᑦ ᑌᒣᑦᑐᓭᓐᓀᑦ ᐊᑭᖏᓐᓂᑦ. ᓄᓇᕕᒻᒥᐅᑦ ᐃᓄᐃᑦ ᐊᓪᓓᑦ ᐱᖁᔭᖓᓂᒃ ᐊᑐᕐᑎᑕᐅᖕᖏᑐᑦ ᑖᒃᓰᔭᕆᐊᖃᓲᒍᑦᓱᑎᓪᓗ ᑲᕙᒪᑐᖃᒃᑯᓄᑦ ᑯᐯᒃᑯᓄᓪᓗ ᑲᓇᑕᒥᐅᒍᖃᑎᒥᑕ ᑖᒃᓰᔭᕆᐊᓕᖏᑦᑕ ᐊᑦᔨᑐᐃᓐᓇᖏᓐᓂᒃ.

ᓄᓇᕕᒻᒥᐅᑦ ᐃᓄᒃᑎᑑᕐᑐᒥᒃ ᐅᖃᐅᓯᓖᑦ, ᐃᓄᓕᒫᑲᓵᓪᓗ ᐃᓄᒃᑎᑑᕈᓐᓇᓱᑎᒃ, 95% ᐅᖓᑖᓅᕐᑐᑦ ᐃᓄᒃᑎᑑᓲᑦ. ᐃᓕᓴᕐᕕᒥ ᐃᓄᒃᑎᑑᕐᓂᖅ ᐃᓕᓭᒍᑕᐅᓲᒍᑦᓱᓂ ᐃᓕᓴᕆᐊᓕᓵᕐᑐᓂᑦ ᐳᕐᑐᓂᓕᓐᓄᑦ 3-ᒥᒃ ᐯᕆᑦᓯᕕᓐᓂᓗ ᐃᓄᒃᑎᑑᓲᒍᒻᒥᓱᑎᒃ. 1950-ᓃᑦᓱᑕ ᑲᕙᒪᑐᖃᒃᑯᑦ ᑲᔪᓯᑎᑦᓯᓯᔪᕕᓃᑦ ᐃᓕᓴᕐᓂᒥᒃ, ᓄᓇᕕᒻᒥᐅᑦ ᐃᓄᐃᑦ ᑕᕝᕙᓂᑦᓭᓈᕐᓗᑎᒃ ᑭᓯᐊᓂᐅᖃᑦᑕᕆᐊᖃᓯᑎᓪᓗᒋᑦ, ᐃᓄᐃᓪᓗ ᕿᒻᒦᔭᕐᑕᐅᓱᑎᒃ ᓄᓇᕕᒻᒥ ᐃᓅᒐᓱᐊᕈᑎᑐᐊᕐᒥᓂᒃ. ᐃᓕᓴᕐᕖᑦ ᑲᒪᒋᔭᐅᔪᑦ ᑲᑎᕕᒃ ᐃᓕᓴᕐᓂᓕᕆᔨᓄᑦ, ᓄᐃᑕᐅᓯᒪᔪᓄᑦ ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᒧᑦ.

ᑯᐯᒃᒥ ᓄᓀᑦ ᑭᓪᓕᓕᐅᕐᑕᐅᓯᒪᓂᖏᓐᓄᑦ ᐱᖁᔭᕐᒧᑦ, 1912-ᒥ ᓄᓇᕕᐅᓂᕋᕐᑕᐅᓕᕐᑐᖅ ᓄᑦᑎᑕᐅᓯᒪᕗᖅ ᑯᐯᒃᒨᑕᐅᑦᓱᓂ ᓄᓇᓕᑐᙯᑦ ᓄᓇᕕᒻᒥᐅᑦ ᐱᒍᓐᓇᐅᑎᖏᑦ ᐃᓕᑕᕆᔭᐅᓂᕐᑖᐸᑕ. ᑯᐯᒃᑯᑦ ᑲᕙᒪᖓᑕ ᐱᓂᐊᕐᓂᖏᑎᒍᑦ ᓄᐃᑦᓯᒍᒪᓯᒪᒻᒪᑕ ᐃᑯᒪᐅᑎᓕᐅᕐᕕᓴᐅᒐᔭᕐᑐᒥᒃ ᔦᒥᓯ ᐯᒥ ᓄᓇᕕᒻᒥᓗ, ᐃᕐᖃᑐᐃᕕᑎᒍᑦ ᐱᓂᐊᕐᓂᖃᕐᕕᐅᒍᒪᓯᓐᓂᖁᑦ ᓯᕗᓪᓕᐹᑦᓯᐊᒥᒃ ᑲᓇᑕᒥ ᐊᖏᖃᑎᒌᒍᑎᒥᒃ ᐊᑎᓕᐅᕐᓂᖃᕈᑕᐅᓚᖓᓯᑎᓪᓗᒍ, ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᒥᒃ. ᓄᓇᕕᐅᑉ ᐊᐅᓚᑕᐅᓂᖓ, ᐊᑎᓕᕐᐅᓂᖃᕐᓯᒪᓕᕐᑎᓗᒍ 1975-ᒥ, ᐃᓂᓪᓚᑕᐅᓯᒪᓂᓕᒃ ᐊᖏᖃᑎᒌᒍᑎᑎᒍᑦ, ᐊᐅᓚᑕᐅᓂᖃᕈᓐᓇᓯᑎᓪᓗᒋᑦ ᐱᑦᓴᖑᕆᐊᓪᓚᑐᑦᓴᓕᕆᓂᖅ ᐆᒪᔪᓕᕆᓂᕐᓗ, ᐅᖃᐅᓯᕐᑕᖏᓐᓂ 23-ᒦᑦᑐᓂ (ᐊᕙᑎᓕᕆᓂᖅ) 24-ᒦᑦᑐᓂ (ᐊᖑᓇᓱᓐᓂᖅ ᐃᖃᓪᓕᐊᓂᕐᓗ). ᑕᒪᕐᒥᒃ ᑖᒃᑯᐊ ᐊᐅᓚᑕᐅᓂᖃᓯᔪᕕᓃᒃ ᐱᖁᔭᖓᑎᒍᑦ ᑯᐯᒃᒥᐅᑦ ᓄᐃᑕᐅᓂᖏᑎᒍᓪᓗ ᐃᒫᙰᓚᔨᑦᓭᑦ ᑲᒪᒋᔭᑦᓴᓖᑦ ᐊᐅᓚᑕᐅᓂᑦᓴᖏᓐᓂᒃ ᐊᕙᑎᓕᕆᓂᐅᑉ ᐊᖑᓇᓱᓐᓂᐅᑉ ᐃᖃᓪᓕᐊᓂᐅᓪᓗ.

(ᓱᓕ) ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᒨᓕᖓᔪᑦ.