ᐱᓇᓱᒍᓯᖓ ᓄᓇᕕᐅᑉ ᑕᕆᐅᖓ ᓱᕐᕋᑕᐅᓕᕐᒪᖔᑦ ᑭᒥᕐᕈᔩᑦ ᑲᑎᒪᔨᖏᑦᑕ
ᕿᒥᕐᕈᖃᑦᑕᓂᖅ
ᐱᓇᓱᑦᑕᐅᒍᒪᒐᔭᕐᑐᒥᒃ ᒪᓂᔨᕕᐅᒍᑎᒃ, ᑲᑎᒪᔩᑦ NMRIRB ᐃᑉᐱᒍᓱᒋᐊᓕᕋᔭᕐᑐᑦ ᒪᓂᔭᐅᔪᖅ ᓱᕐᕃᓂᖃᑐᐃᓐᓇᕆᐊᖃᕐᒪᖔᑦ, ᕿᒥᕐᕈᔭᐅᔪᑦᓴᐅᒪᖔᓪᓘᓃᑦ 5-ᒦᑦᑐᑦ ᑐᑭᐊᒍᑦ (ᑲᑎᒪᔨᓄᑦ NMRIRB ᕿᒥᕐᕈᔭᐅᓗᑎᒃ) ᐅᕝᕙᓘᓐᓃᑦ 6-ᒦᑦᑐᑦ ᑐᑭᐊᒍᑦ (ᑲᕙᒪᑐᖃᒃᑯᑦ ᕿᒥᕐᕈᔨᖏᓐᓄᑦ).
ᕿᒥᕐᕈᔭᐅᖁᔭᐅᔪᓂᒃ ᒪᓂᔨᕕᐅᒐᒥᒃ, ᑲᑎᒪᔩᑦ NMRIRB ᑐᑭᒧᐊᒍᑎᖃᓲᑦ ᑕᑲᒃᑯᓂᖓ ᑐᖕᖓᕕᖃᕐᓱᑎᒃ:
a) ᑲᑎᒪᔩᑦ NMRIRB ᑐᑭᑖᕋᔭᕐᑐᑦ ᕿᒥᕐᕈᔭᐅᔪᖃᕆᐊᖃᕐᐸᑦ, ᐃᒻᒥᓂᒃ ᑐᑭᑖᕈᑎᒋᑦᓱᒍ,
i) ᐱᓇᓱᑦᑕᐅᒍᒪᔪᖅ ᓱᕐᕃᓂᖃᑐᐃᓐᓇᕆᐊᖃᕐᒪᖔᑦ ᐆᒪᔪᐃᑦ ᓇᔪᒐᖏᓐᓂᒃ, ᐆᒪᔪᓂᒃ ᐅᕝᕙᓘᓐᓃᑦ ᓄᓇᕕᒻᒥᐅᑦ ᐃᓄᐃᑦ ᐊᖑᓇᓱᓐᓂᕆᓲᖏᓐᓂᒃ;
ii) ᐱᓇᓱᑦᑕᐅᒍᒪᔪᖅ ᓱᕐᕃᓂᖃᑐᐃᓐᓇᕆᐊᖃᕋᔭᕐᒪᑦ ᐃᓅᓯᒃᑯᑦ-ᒪᑭᑕᒐᓱᐊᕐᓂᑯᓪᓗ ᑕᖅᕋᒥᐅᓂᒃ;
iii) ᐱᓇᓱᑦᑕᐅᒍᒪᔪᖅ ᓇᐅᓕᒫᓄᑦ ᐃᓱᒫᓗᓐᓇᓚᖓᑐᐊᕐᐸᑦ, ᐅᕝᕙᓘᓐᓃᑦ
iv) ᐱᓇᓱᑦᑕᐅᒍᒪᔪᖅ ᓄᑖᓂᒃ ᐃᓱᕐᕉᑎᓂᒃ ᐊᑐᕈᑕᐅᓚᖓᑉᐸᑦ ᖃᓄᓪᓗᐊᖅ ᓱᕐᕃᓂᖃᕋᔭᕐᒪᖔᑕ ᖃᐅᔨᒪᓇᖕᖏᑐᓂᒃ
b) ᑲᑎᒪᔩᑦ NMRIRB ᑐᑭᑖᕋᔭᕐᑐᑦ ᕿᒥᕐᕈᔭᐅᔪᖃᕆᐊᖃᖕᖏᐸᑦ, ᐃᒻᒥᓂᒃ ᑐᑭᑖᕈᑎᒋᑦᓱᒍ, ᐱᓇᓱᑦᑕᐅᒍᒪᔪᖅ ᓇᐅᓕᒫᓄᑦ ᐃᓱᒫᓗᓐᓇᓚᖓᖕᖏᑐᐊᕐᐸᑦ ᐊᒻᒪᓗ,
i) ᓱᕐᕋᑕᐅᓂᖃᕈᓇᐅᓚᖓᖕᖏᐸᑦ ᐆᒪᔪᐃᑦ ᓇᔪᓲᖓ ᐊᒻᒪᓗ ᐃᓅᓯᒃᑯᑦ-ᒪᑭᑕᒐᓱᐊᕐᓂᑯᓪᓗ ᓱᕐᕋᑕᐅᓂᖃᕈᓇᐅᓚᖓᖕᖏᐸᑦ, ᐅᕝᕙᓘᓐᓃᑦ
ii) ᐱᓇᓱᑦᑕᐅᒍᒪᔪᖅ ᓱᕐᕃᓂᖃᑐᐃᓐᓇᕆᐊᖃᕋᔭᕐᑐᑦ ᖃᐅᔨᒪᓇᑐᐃᓐᓇᑐᐊᕐᐸᑕ ᐃᑯᓪᓚᑎᒋᐊᕈᓐᓇᐸᑕᓗ ᓄᑖᑦ ᐃᓱᕐᕉᑏᑦ ᖃᐅᔨᒪᒍᑎᒋᓗᒋᑦ.
ᑲᑎᒪᔩᑦ NMRIRB ᐃᑉᐱᒋᑦᓯᐊᕆᐊᓕᓐᓂᒃ ᕿᒥᕐᕈᔨᐅᓲᑦ 45 ᐅᓪᓗᐃᑦ ᓈᓚᐅᕐᑎᓇᒋᑦ ᕿᒥᕐᕈᕋᑦᓴᑖᕐᑎᑕᕕᓂᐅᑦᓱᑎᒃ. ᒪᓕᑦᓱᒍ ᐊᖏᖃᑎᒌᒍᑎᒃ NILA, ᑲᑎᒪᔩᑦ NMRIRB ᓯᑕᒪᓂᒃ ᓇᓪᓕᑳᕐᕕᓴᖃᓲᑦ ᒪᓂᔨᒋᐊᖃᓯᑐᐊᕋᒥᒃ ᕿᒥᕐᕈᓯᒪᔭᒥᓅᓕᖓᔪᓂᒃ ᑐᓴᕐᑎᓯᒍᑎᒥᓂᒃ ᑐᕐᖃᑕᕐᕕᒧᑦ ᑕᒪᑐᒥᖓ ᑲᒪᒋᔭᑦᓴᓕᒻᒧᑦ:
- ᕿᓄᒍᑎᓕᐅᕐᑐᖃᕈᓐᓇᑐᖅ ᕿᒥᕐᕈᔭᐅᓂᖃᖕᖏᑐᒥᒃ ᒪᓕᑦᓱᒋᑦ 5-ᒦᑦᑐᑦ 6-ᒦᑦᑐᐃᓘᓐᓃᑦ; ᑲᑎᒪᔩᑦ NMRIRB ᐅᓐᓂᑑᑎᖃᕈᓐᓇᑐᑦ ᒪᓕᑦᑕᐅᒋᐊᓕᓐᓂᒃ ᐃᓚᒋᓕᐅᑎᔭᐅᓯᒪᒐᔭᕐᑐᓂᒃ ᐊᖏᕈᑕᐅᓯᒪᔪᓄᑦ ᑲᑎᒪᔩᑦ ᑐᕌᒐᖏᓐᓅᓕᖓᔪᓄᑦ
- ᕿᓄᒍᑏᑦ ᕿᒥᕐᕈᔭᐅᓂᖃᕆᐊᖃᓲᑦ ᒪᓕᓪᓗᒋᑦ 5-ᒦᑦᑐᑦ 6-ᒦᑦᑐᐃᓘᓐᓃᑦ; ᑲᑎᒪᔩᑦ NMRIRB ᓇᓗᓀᕐᓯᔨᐅᒐᔭᕐᑐᑦ ᐱᓐᓀᓗᑕᐅᔪᓂᒃ ᐃᓱᒫᓘᑎᐅᔪᓂᓪᓘᓃᑦ ᐃᓱᒪᒋᓕᐅᑎᔭᐅᒋᐊᓕᓐᓂᒃ ᕿᒥᕐᕈᓂᖃᓕᕐᐸᑦ;
- ᕿᓄᒍᑎ ᐱᑦᓯᐊᓯᒪᖕᖏᐸᑦ ᕿᒥᕐᕈᒐᑦᓴᓯᐊᒍᒐᓂᓗ, ᐅᑎᕐᑎᑕᐅᒋᐊᖃᕐᓂᐸᓪᓗ ᕿᓄᒍᑎᓕᐅᕐᑐᕕᓂᕐᒧᑦ ᑐᑭᓯᓇᕐᑎᑕᐅᒋᐊᓪᓚᕆᒋᐊᖃᕐᓗᓂ, ᐅᕝᕙᓘᓐᓃᑦ
- ᓱᕐᕃᓂᐅᑐᐃᓐᓇᕆᐊᓖᑦ ᕿᓄᒍᑎᓃᑦᑐᑦ ᓱᒐᓗᓗᐊᑦᓯᐊᐸᑕ ᐊᓯᑦᔨᒋᐊᕐᑕᐅᔪᑦᓴᐅᓗᑎᒃ ᑲᒪᒋᔭᑦᓴᐅᒍᓐᓀᓗᑎᓪᓘᓃᑦ.
ᕿᒥᕐᕈᓃᑦ
ᕿᒥᕐᕈᓃᑦ ᓱᓇᒥᑦᓯᐊᓂᕐᓴᐅᕗᑦ ᐊᑑᑎᔭᐅᓲᒍᑦᓱᑎᒃ ᐱᓪᓚᕆᖕᖑᐊᑦ ᐱᓇᓱᑦᑕᐅᔪᑦᓭᑦ ᕿᒥᕐᕈᔭᐅᒋᐊᖃᓕᕐᐸᑕ ᐅᕝᕙᓘᓐᓃᑦ ᕿᒥᕐᕈᔭᐅᒋᐊᖃᓕᕐᐸᑕ ᐱᓇᓱᑦᑕᐅᔪᑦᓭᑦ ᓇᐅᓕᒫᓄᑦ ᐃᓱᒫᓘᑎᒋᔭᐅᓗᐊᖕᖑᐊᑐᑦ. ᑲᑎᒪᔩᑦ NMRIRB ᖃᐅᔨᑎᑦᓯᐸᑕ ᑐᕐᖃᑕᕐᕕᒥᒃ ᑕᒪᑐᒥᖓ ᑲᒪᒋᔭᑦᓴᓕᒻᒥᒃ ᕿᓄᒍᑕᐅᓯᒪᔪᒥᒃ ᕿᒥᕐᕈᔭᐅᔪᖃᕆᐊᖃᕐᑎᓗᒍ, ᑐᕐᖃᑕᕐᕕᒃ ᖃᐅᔨᑎᑦᓯᒐᔭᕐᑐᖅ ᕿᓄᒍᑎᐅᑉ 5-ᒦᑦᑐᓅᓕᖓᓂᖓᓂᒃ ᕿᒥᕐᕈᓂᕆᓲᖓᑕ ᑲᑎᒪᔩᑦ NMRIRB ᐅᕝᕙᓘᓐᓃᑦ ᐱᓇᓱᑦᑕᐅᔪᑦᓴᒥᒃ ᕿᒥᕐᕈᔭᐅᖁᔨᓗᑎᒃ 6-ᒦᑦᑐᑦ ᕿᒥᕐᕈᓃᑦ ᒪᓕᓪᓗᒋᑦ ᕿᒥᕐᕈᓂᕆᓲᖏᑦ ᑲᕙᒪᑐᖃᒃᑯᑦ ᐊᕙᑎᒥᒃ ᑭᒥᕐᕈᔨᖏᓐᓄᑦ.
ᐃᑉᐱᒋᔭᖃᕐᓂᖅ
ᒪᓕᑦᑕᐅᒋᐊᓖᑦ ᐅᑯᓇᓃᑦᑐᑦ:
- ᑲᑎᒪᔩᑦ NMRIRB ᐱᓇᓱᑦᑕᐅᒋᐊᓕᓐᓄᑦ ᓇᓗᓀᕐᑕᐅᓯᒪᒍᑎᖏᓐᓂ
- ᑲᑎᒪᔩᑦ NMRIRB ᖃᐅᔨᓴᕐᓂᒧᑦ ᑐᑭᑖᕆᓲᖏᓐᓂ; ᐅᕝᕙᓘᓐᓃᑦ
- ᐊᖏᕈᑕᐅᓯᒪᔪᑦ ᐱᓯᒪᔪᑦ ᓄᓇᕘᕐᒥ ᐃᒪᓕᕆᓂᕐᒧᑦ ᑲᑎᒪᔨᓄᑦ.
ᓄᐃᑦᓯᒍᑕᐅᑐᐃᓐᓇᕆᐊᓖᑦ ᐃᑉᐱᒋᔭᐅᒍᑎᑦᓴᖓᓂᒃ ᐱᓇᓱᑦᑕᐅᒍᒪᔫᑉ ᑲᒪᒋᔭᑦᓴᐅᓚᖓᑉᐸᑦ ᓴᐳᑦᔨᔪᓄᑦ, ᑲᑎᒪᔨᓄᑦ NMRIRB ᑲᕙᒪᓄᓪᓘᓃᑦ.
ᐱᑦᔪᑎᖏᑦ ᐃᑉᐱᒋᔭᖃᕐᓂᐅᑉ:
- ᖃᐅᔨᒍᒪᒧᑦ ᓱᕐᕃᓂᕆᑐᐃᓐᓇᕆᐊᓕᖓᓂᒃ ᐱᓇᓱᑦᑕᐅᒍᒪᔪᑦ ᐆᒪᔪᐃᑦ ᓇᔪᓲᖏᓐᓂᒃ ᐃᓅᓯᒃᑯᑦ- ᒪᑭᑕᒐᓱᐊᕐᓂᑯᓪᓗ ᓱᕐᕋᑕᐅᒍᑎᐅᒍᓐᓇᑐᓂᒃ ᓄᓇᕕᐅᑉ ᑕᕆᐅᖓᓂ;
- ᖃᐅᔨᒍᒪᒧᑦ ᖃᓄᓪᓗᐊᑎᒋ ᐊᑐᕐᑕᐅᓂᖃᕐᒪᖔᑦ ᓄᓇ ᐱᑦᓴᑕᖏᓪᓘᓃᑦ ᒪᓕᑦᑕᐅᒋᐊᓕᑎᒍᑦ;
- ᑐᑭᓯᒪᐅᑎᑦᓴᓂᒃ ᐊᑐᐃᓐᓇᐅᑎᑦᓯᒍᒪᒧᑦ ᐊᓪᓚᕕᖃᕐᕕᒋᔭᐅᔪᓄᑦ ᐊᑐᓕᕐᑎᓯᒋᐊᓕᓐᓄᑦ ᒪᓕᒐᕐᓂᒃ ᐊᑐᕐᑕᐅᓂᖓᓄᑦ ᓄᓇᐅᑉ ᐱᑦᓴᑖᕐᕕᓭᓪᓗ ᐊᖏᕈᑕᐅᓯᒪᒋᐊᖃᕐᓂᖏᑦᑕ; ᐊᒻᒪᓗ
- ᕿᒥᕐᕈᓯᐊᕈᒪᒧᑦ ᓈᒻᒪᓈᑦᓯᐊᒪᖔᑕ ᒥᑦᓴᐅᓵᕐᑕᐅᓯᒪᒍᑎᖏᑦ ᐱᓇᓱᑦᑕᐅᔪᑦᓭᑦ ᓱᕐᕃᓂᕆᑐᐃᓐᓇᕆᐊᓕᖏᑦᑕ ᐅᖃᐅᓯᕐᑕᖏᑦ.